برشا كلام يتقال على تليفونات “خارجة كيل بشكوتو”، أما الأرقام الرسمية متاع Statcounter للربع الأول من 2026 عندها رأي آخر. حسب إحصائيات الاستعمال في تونس، فمة ماركات قاعدة تاكل في السوق وصراع كبير على المرتبة الثانية.
ملاحظة: فمّا إحصائيّة غريبة و باش نحاولو نفكّكو الشيفرة متاعها 🔍
⏬ إليكم الترتيب الحقيقي اللي يدوّخ:
المصدر: موقع statcounter.com 📈
1️⃣ سامسونج (Samsung): الملك الذي لا يقهَر
بنسبة 29.7%، سامسونغ مازالت هي “الغول” الأول في تونس وهاربة بالجميع.
علاش التونسي يحب السامسونغ؟ القصة موش مجرد ماركة، سامسونج خذات ثقة عمياء بفضل الـ Software Optimization الStable و المريغل, التليفون ما يتبلوكاش بعد شهرين استعمال. زيد عليها “وضوح و جودة الكاميرا في هواتف سامسونغ” اللي عملت سمعة عالمية, التوانسة (خاصة البنات) يحبوا الألوان الحية والوضوح متاع سامسونج اللي يواتي الـ Social Media.
مكانة خاصة: التليفون هذا “متسمّي” في تونس، و عندو بلاصة قوية في قلوب التوانسة، خاصة الكبار في العمر اللي يشوفوا فيه “الأصل” والضمان، والبنات اللي يلوجوا على الديزاين والـ Selfie المريغل.
رأس مال مضمون: الحاجة اللي تميز سامسونج هي قيمة ما بعد البيع؛ تشري سامسونج اليوم، تضمن فيه “بيعة وشرية” مقبولة بعد عام وإلا اثنين. تليفون يشد سومو وقطايعو موجودة في كل بلاصة، وهذا اللي يخلي التونسي يدفع فلوسه وهو مرتاح.
2. شاومي (Xiaomi): “محبوبة الزوّالي..” لكن بدات تِفرَاني؟ 🏃♂️🐢
بنسبة 15.42%، شاومي شادة المرتبة الثانية، أما الـ “Ecart” بينها وبين سامسونج ولى كبير. 📊
صدمة الأسعار: 💰 شاومي اللي كانت تبيع “بلاش فلوس” بدأت تفراني، والأسعار شعلت فيها النار! 🔥 الزبون التونسي ولى يتفاجأ كي يلقى موديلات من شاومي فاتت المليون. العباد بدأت تسأل: “كان بش ندفع مليون و800 في شاومي، علاش ما نزيدش شوية ونأخذ سامسونج وإلا آيفون مستعمل؟”
الواقع المُرّ: برشا عباد فدّت من حكاية الـ Capteur de proximité (تليفون يتحل بوذنك وإنت تتكلم) و شوي مشاكل في Software. شاومي توة شادة روحها بسلسلة الـ Redmi Note اللي تخرج بالبالة، أما لازمها تفيق خاطر الزوّالي ولى يلوج على “الاستقرار” و السوم، خاصة توة اللي السوم ولى “Premium”! 🛠️🚫
3. أيفون (Apple): “الفخرة” والـ Occasion
بنسبة 14.71%، أبل 🍎 لاصقة شاومي في الظهر! ⚔️ 🔥
الحقيقة اللي تبهت:😯 تونس بلد “تاعب” مادياً أما الآيفون في كل جيب. السر؟ موش التوانسة الكل شارين الـ 15 والـ 16 Pro Max، السر في سوق المستعمل. التونسي يفضل يشري iPhone 13 مستعمل على إنو يشري أندرويد جديد بمليون. Apple في تونس هي “بريستيج” قبل كل شيء.
4. إنفينيكس (Infinix): “حبيب” الطبقة المنسحقة 👷🏽
بنسبة 9.81%، إنفينيكس فكت بلاصة الكبار.
السر: الماركة هذي تبيع في “الأوهام الجميلة”. رامات 16 جيغا (وهمية) وشاشة عملاقة بـ 500 دينار. هذي الماركة اللي تخرج “كيل بشكوتو” للشباب اللي يحب “يلعب” وما عندوش ميزانية.
💡 ملاحظة برشا تاك (تطور ملحوظ): للأمانة، الماركة هذي السنا (2026) بدات “تتحسّن” وتصلح في روحها برشا. ما عادش تحكي كان على الأرقام الوهمية، بل بدأت تخرج في تليفونات “محترمة” بصراحة, مالـتصميم متاع التليفون، لجودة الشاشات، وحتى استقرار السوفتوير اللي تحسن بياسر على قبل. ولات ماركة “مهمة” وتفرض في روحها كمنافس جدي موش مجرد بديل رخيص. 📈✅
📉 الأرقام اللّي تحكي (Jan-Apr 2026):
- Samsung: 29.7% (المسيطر في تونس منذ سنوات)
- Xiaomi: 15.42% (محافظة على المرتبة الثانية أما مردودها طاح)
- Apple: 14.71% (البرستيج و الإنسجام بين السوفت و الهاردوير)
- Infinix: 9.81% (حبيب هواة الألعاب و بسطاء القوم)
- Oppo: 7.31% (تصويرة سمحة أما غالي)
🧐 زوم (Zoom) على معطيات و أرقام السوق:
حكاية الـ Unknown (9.48%):هاذي تبهّت!! قرابة 10% من التليفونات في تونس “مجهولة”. هذي هي التليفونات اللي داخلة بطرق أخرى غير المسالك الرسمية “سوق سوداء” والنسخ الصينية. رد بالك يغرك السوم كيف تجي تشري تليفون من مواقع التواصل الإجتماعي أو من السوق السوداء “المهرّب“, و باش نعملو مقال فيه دليل شراء باش ما تحصلش 🕵️
هونر (Honor) وريلمي (Realme): رغم الحس اللي عاملينو في Facebook و غيرو ، الأرقام توريك اللي هم مازالوا “صغار” برشا في تونس, مثلا: (Realme بـ 1.6% فقط!). يعني الإشهار حاجة والمبيعات الحقيقية حاجة أخرى, او ممكن لاقين رواج كبير ومبيعات كبيرة في السوق الموازية خاصة هونور.
💡🫱🏻🫲🏼الخلاصة:
** سامسونج مازالت هاربة، أبل قاعدة “تاكل” في شاومي، وإنفينيكس هي اللي بش تحكم في الفئة الشعبية, و هونور و بعض الماركات مسيطرين في الأسواق الموازية أكثر بسبب القيمة مقابل السعر التي توفره الأسواق الموازية على مواقع التواصل.
وإنت، تليفونك موجود في الـ Top 5 وإلا “Unknown” ومخبي راسك؟ 😀
كان تكنو تدخل السوق التونسي بمودالات camon و pova curve و spark slim…نأكدلك ألا ما تطلع للمرتبة 3 بكل سهولة…خسارة الموردين في تونس مهمش من الدومان
صحيح خويا الغالي هاكا علاش البيوع في ال”Marché noir ou parallel” ماشي مليح خاطر يجيبو في حاجات بصراحة تطير من غير معاليم ديوانيّة و الهرج هاكا الكل، يعني المربوح 100 في 100 و المورّدين كيف ما قلت إنتي تاعبين و موش دارسين السوق مليح
التكنو في العالم قاعد تاخو في بلاصة محترمة و تلعب على نقطة “القيمة مقابل السعر” و قاعدة تغزو في بعض الأسواق الآسياوية و امريكا الجنوبية و حصة قليلة من السوق الاوروبية